नागपूर : नागपूरच्या वाडी भागात चार वर्षांच्या मुलीवर बलात्कार करून तिची हत्या केल्याप्रकरणी दोषी ठरलेल्या वसंत संपत दुपारेचा दयेचा अर्ज राष्ट्रपती द्रौपदी मुर्मू यांनी फेटाळला आहे. त्यामुळे आरोपीची फाशीची शिक्षा कायम आहे. या घडामोडींमुळे 1993 च्या मुंबई बॉम्बस्फोटातील मुख्य आरोपी याकूब मेमननंतर नागपूर तुरुंगात दुसरी फाशी होणार आहे.
सुप्रीम कोर्टाने 3 मे 2017 रोजी खुनाचा दोषी वसंत दुपारे याची पुनर्विलोकन याचिका फेटाळून लावली होती आणि फाशीची शिक्षा कायम ठेवली होती. 28 मार्च 2023 रोजी त्यांनी राष्ट्रपतींकडे दयेचा अर्ज दाखल केला.
Gold Rate
19 April 2025
माहितीनुसार, 3 एप्रिल 2008 रोजी वाडी परिसरात माणुसकीला काळीमा फासणारी घटना घडली. वसंत हा त्याच्या शेजारी राहणाऱ्या चार वर्षांच्या मुलीला चॉकलेटचे आमिष दाखवले. त्याने तिच्यावर बलात्कार केला आणि नंतर दगडाने ठेचून तिची निर्घृण हत्या केली.
या धक्कादायक कृत्यासाठी नागपूर अतिरिक्त सत्र न्यायालयाने २३ फेब्रुवारी २०१२ रोजी फाशीची शिक्षा सुनावली होती. मुंबई उच्च न्यायालयाच्या नागपूर खंडपीठानेही 26 नोव्हेंबर 2014 रोजी दुपारे यांना कोणतीही दयामाया न दाखवता फाशीची शिक्षा कायम ठेवली.
त्या शिक्षेला दुपारे यांनी सर्वोच्च न्यायालयात आव्हान दिले होते. त्यावेळी सुप्रीम कोर्टाचे न्यायमूर्ती दीपक मिश्रा यांच्या अध्यक्षतेखालील खंडपीठाने 2014 मध्ये वसंत दुपारे यांची फाशीची शिक्षा कायम ठेवली होती.दरम्यान, दुपारे यांनी फाशीच्या शिक्षेचा फेरविचार करावा, अशी पुनर्विचार याचिका सर्वोच्च न्यायालयात दाखल केली होती. न्यायमूर्ती दीपक मिश्रा, न्यायमूर्ती रोहिंटन फली नरिमन आणि न्यायमूर्ती उदय ललित यांच्या पूर्ण खंडपीठासमोर त्यावर सुनावणी झाली. मात्र, अशा विकृत घटनांना आळा घालण्यासाठी आणि गुन्हेगारांना शिक्षा देण्यासाठी फाशीची शिक्षा योग्य आहे, असे नमूद करत दुपारे यांची याचिका सर्वोच्च न्यायालयाने 2017 मध्ये फेटाळली होती.
3 एप्रिल 2008 रोजी वाडी परिसरातील चार वर्षांच्या चिमुरडीला घरासमोरून उचलल्यानंतर दुपारी खाडगाव येथील मातानगर परिसरात नेले. त्याच रात्री आरोपी वसंत गड्डीगोदाम परिसरात फिरत असल्याची गुप्त माहिती पोलिसांना मिळाली. पोलिसांनी त्याला ताब्यात घेऊन चौकशी केली. त्यानंतर त्यांनी त्याच रात्री खडगाव येथील घटनास्थळ दाखवले. या तपासात मुलावर बलात्कार करून तिचा दगडाने ठेचून खून केल्याचे समोर आले आहे. यानंतर वसंत दुपारे याच्याविरुद्ध वाडी पोलिस ठाण्यात गुन्हा दाखल करण्यात आला. पोलिसांनी अटक केल्यानंतर दुपारे हा नागपूर मध्यवर्ती कारागृहात बंदिस्त आहे. सत्र न्यायालयाने फाशीची शिक्षा सुनावल्यानंतर 2012 मध्ये त्याला कारागृहाच्या फासी यार्डात ठेवण्यात आले होते. राष्ट्रपतींच्या सचिवालयातून फाशीचे आदेश मिळाल्यानंतर त्याला फाशी देण्यात येणार असल्याची माहिती समोर आली आहे.
