नागपूर. विदर्भ अर्बन बँक्स को-ऑपरेटिव्ह असोसिएशन लि. नागपूर यांच्या वतीने शेगाव येथे सोमवार १० फेब्रुवारी व मंगळवार ११ फेब्रुवारी रोजी विदर्भातील नागरी सहकारी बँकांच्या संचालकांकरिता दोन दिवसीय कार्यशाळेचे आयोजन करण्यात आले होते. विदर्भातील सर्वच बँकांचे प्रश्न आणि समस्या सोडविण्यासंदर्भात सर्व नागरी सहकारी बँकांना एकत्र आणण्याकरिता व कामात एकरुपता आणण्याच्या उद्देशाने ही कार्यशाळा घेण्यात आली होती.
सोमवारी १० फेब्रुवारी रोजी राज्याचे कामगार मंत्री अॅड. आकाश फुंडकर यांच्या हस्ते कार्यशाळेचे उद्घाटन झाले. तर मंगळवारी ११ फेब्रुवारी रोजी गृह व सहकार राज्य मंत्री डॉ. पंकज भोयर यांच्या प्रमुख उपस्थितीत कार्यशाळेचा समारोप झाला. दोन्ही कार्यक्रमांमध्ये विदर्भ अर्बन बँक्स को-ऑपरेटिव्ह असोसिएशनचे अध्यक्ष रवींद्र दुरुगकर, उपाध्यक्ष सतीश गुप्त, सचिव तुषारकांती डबले, सहसचिव सुभाष देवाळकर आदी प्रामुख्याने उपस्थित होते.
Gold Rate
Wednesday12 Feb. 2025
कार्यशाळेमध्ये नागरी सहकारी बँकांच्या संदर्भात बँकिंग रेग्युलेशन अॅक्टमधील अद्ययावत बदलांबाबत तसेच को-ऑपरेटिव्ह बँकिंग सेक्टरमध्ये कृत्रिम बुद्धिमत्तेचा वापर या विषयांवर तज्ज्ञांनी मार्गदर्शन केले. तसेच रिझर्व्ह बँकेचे उपमहाप्रबंधक यू. श्रीनाथ यांनी संचालकांची जबाबदारी व नियमन तत्वे या विषयावर उपस्थितांना मार्गदर्शन केले. दोन दिवसीय कार्यशाळेअंतर्गत उत्कृष्ट बँक स्पर्धा घेण्यात आली. तीन गटात ही स्पर्धा घेण्यात आली होती. यामध्ये प्रत्येक गटातील प्रथम, द्वितीय व तृतीय क्रमांक विजेत्या नागरी सहकारी बँकांना राज्य मंत्री डॉ. पंकज भोयर यांच्या हस्ते पुरस्कार प्रदान करण्यात आले.
कार्यशाळेमध्ये विदर्भ अर्बन बँक्स को-ऑपरेटिव्ह असोसिएशन लि. नागपूरचे सर्व संचालक मंडळ तसेच विदर्भातील सदस्य नागरी सहकारी बँकांचे अध्यक्ष, उपाध्यक्ष व संचालक गण उपस्थित होते. कार्यक्रमाच्या यशस्वीतेसाठी विदर्भ अर्बन बँक्स को-ऑपरेटिव्ह असोसिएशन लि.चे मुख्य कार्यकारी अधिकारी विजय वंधारे यांच्या नेतृत्वात सर्व कर्मचाऱ्यांनी परीश्रम घेतले.
कार्यक्रमाचे संचालन असोसिएशनचे सहसचिव सुभाष देवाळकर यांनी केले व शेवटी त्यांनी आभारही मानले.
