नागपूर: जिल्ह्यातील भाजपच्या दोन आमदारांना मोठा झटका बसला आहे. हिंगणा मतदारसंघाचे आमदार समीर मेघे आणि काटोल मतदारसंघाचे आमदार चरणसिंह ठाकूर यांना मुंबई उच्च न्यायालयाच्या नागपूर खंडपीठाने नोटीस बजावली आहे. न्यायालयाने या दोघांना येत्या तीन आठवड्यांच्या आत उत्तर सादर करण्याचे आदेश दिले आहेत.
राष्ट्रवादी काँग्रेसच्या (शरदचंद्र पवार गट) नेत्यांचा आक्षेप –
Gold Rate
18 April 2025
ही कारवाई राष्ट्रवादी काँग्रेस (शरदचंद्र पवार गट) च्या पराभूत उमेदवारांनी दाखल केलेल्या याचिकांनंतर करण्यात आली आहे. हिंगण्यातील पराभूत उमेदवार रमेशचंद्र बंग आणि काटोलमधील सलील देशमुख यांनी दावा केला आहे की, भाजपच्या उमेदवारांनी निवडणुकीदरम्यान नियमांचे उल्लंघन केले आहे. त्यामुळे दोघांच्याही विजयावर प्रश्नचिन्ह निर्माण होत आहे.
याचिकांमध्ये काही गंभीर आरोप करण्यात आले असून, प्रचारादरम्यान आचारसंहितेचे उल्लंघन, खर्चाच्या नियमांचे पालन न करणे, तसेच निवडणूक प्रक्रियेत अपारदर्शकता आल्याचे नमूद केले आहे. त्यामुळे या दोन्ही आमदारांची निवड अवैध ठरवावी, अशी मागणी करण्यात आली आहे.
भाजपच्या गोटात खळबळ –
या घडामोडीमुळे नागपूर जिल्ह्यातील राजकीय वातावरण तापले आहे. भाजपच्या गडात अशा प्रकारची न्यायालयीन कारवाई होणे, हे पक्षासाठी मोठे आव्हान मानले जात आहे. येणाऱ्या काळात या प्रकरणात काय निकाल लागतो, याकडे संपूर्ण राज्याचे लक्ष लागले आहे.
